അഴിയൂർ : (vatakaranews.in) ഗ്രാമ പഞ്ചായത്ത് പതിനാറാം വാർഡിൽ നടന്ന കൂട്ടായ്മയുടെ ഓണാഘോഷം സൗഹൃദത്തിൻ്റേയും സന്തോഷത്തിൻ്റെയും ഐക്യത്തിൻ്റെയും മഹിത സന്ദേശം വിളിച്ചോതി ചരിത്രമായി.
ഹംസക്കയും കാസിംക്കയും ഇലവിരിക്കുന്നു, രമേശേട്ടനും സുജിയും ഷിജുവും സദ്യ വിളമ്പുന്നു, നിറസാന്നിധ്യമായി സത്യേട്ടൻ.... ചന്ദ്രിയേച്ചിയും ബേബി യേച്ചിയും ശർമ്മിളേച്ചിയും പച്ചടിയും കൂട്ട് കറിയുമായി ഓടുന്നു. പപ്പടം ബക്കറ്റുമായി സൗജത്തും സജീവം.
വാർഡ് വികസന ജനകീയ സമിതിയുടെ നേതൃത്വത്തിലാണ് ഗ്രാമോണം-23 എന്ന പേരിൽ ഓണാഘോഷം ജനകീയമായ രീതിയിൽ കൊണ്ടാടിയത്. ആഘോഷ ചടങ്ങ് അഴിയൂർ ഗ്രാമപഞ്ചായത്ത് പ്രസിഡണ്ട് ആയിഷ ഉമ്മർ ഉദ്ഘാടനം ചെയ്തു.
വാർഡ് മെമ്പർ സാലിം പുനത്തിൽ അദ്ധ്യക്ഷത വഹിച്ചു. വാർഡ് കൺവീനർ സജീർ വി പി സ്വാഗതം പറഞ്ഞു. വാർഡ് വികസന സമിതി അംഗങ്ങളായ രമേശൻ സി വി .സുജീഷ് പി വി, ബേബി പി വി എന്നിവർ ആശംസ അർപ്പിച്ചു. വാർഡിലെ വിദ്യാർത്ഥികൾ വിവിധ കലാപരിപാടികൾ നടത്തി.
കുടുംബശ്രീ, തൊഴിലുറപ്പ് പ്രവർത്തകരടക്കമുള്ളവരുടെ കസേരക്കളി, സുന്ദരിക്ക് പൊട്ട് തൊടൽ, കുപ്പിയിൽ വെള്ളം നിറക്കൽ, ലെമൺ സ്പൂൺ പ പരിപാടികളും അരങ്ങേറി.
വാർഡിലെ സിഡിഎസ് മെമ്പർ, ആശാ വർക്കർ, അംഗനവാടി വർക്കർമാർ, ഹരിത കർമ്മ സേന അംഗങ്ങൾ, കാർഷിക കർമ്മ സേന എന്നിവരെ മെമൻ്റോ നൽകി ആദരിച്ചു.
പരിപാടിയിൽ ആദ്യവസാനം പങ്കെടുത്തവരിൽ പത്ത് പേർക്ക് നറുക്കെടുപ്പിലൂടെ ഓണപ്പുടവയും സമ്മാനമായി നൽകി. വാർഡിലെ തൊഴിലുറപ്പ് പ്രവർത്തക മൈഥിലി പുത്തൻവളപ്പിലിൻ്റെ നേതൃത്വത്തിലാണ് വിഭവസമൃദ്ധമായ സ്നേഹസദ്യ ഒരുക്കിയത്.
വാർഡിലെ വിവിധ കുടുംബശ്രീകളാണ് വിവിധ വിഭവങ്ങൾ എത്തിച്ചത്. നൂറുകണക്കിന് വാർഡ് നിവാസികൾ ഓണ സ്നേഹസദ്യയിൽ പങ്കാളികളായി.
വികസന സമിതി അംഗങ്ങളായ സനൂജ് ടി പി, ഷിജു ഇ ടി, സിയാദ് എരിക്കിൽ, മൻഷുദ് ഇ സി, മുനീർ കെ കെ തൊഴിലുറപ്പ് മേറ്റുമാരായ വിപിഷ നാലകത്ത്, ഷുഭ ധനേഷ്, സരിത, വാർഡ് നിവാസികളായ സത്യൻ പി വി, രാജൻ എൻ കെ, മഷൂദ് ഇ സി, റേഷിത്ത് ആശാരിൻ്റവിട, രജീഷ് ബാപ്പുട്ടി എന്നിവരും വിവിധ കുടുംബശ്രീ തൊഴിലുറപ്പ് പ്രവർത്തകരും പരിപാടിക്ക് നേതൃത്വം നൽകി.
#GRAMONAM-23 unity and harmony; 'Gramonam-23' Onam friendly association in Azhiyur
