ആയഞ്ചേരി: (vatakara.truevisionnews.com)വടകര റെയിൽവേ മെയിൽ സർവീസ് ഓഫീസ് (ആർഎംഎസ്) റെയിൽവേസ്റ്റേഷൻ പരിസരത്ത് തന്നെ നിലനിർത്തണമെന്ന് ആവശ്യപ്പെട്ട് കെ.പി.കുഞ്ഞമ്മകുട്ടി മുഖ്യമന്ത്രി പിണറായി വിജയന് കത്ത് നൽകി.
കൊയിലാണ്ടി മുതൽ മാഹി വരെയും മലയോര മേഖലകളായ കാവിലുംപാറ, പെരുവണ്ണാമുഴി തുടങ്ങിയ വിദൂര സ്ഥലങ്ങളിലേക്കുമുള്ള തപാൽ ഉരുപ്പടികൾ തരംതിരിക്കുകയും സമയബന്ധിതമായി വിതരണം ചെയ്യുകയും ചെയ്യുന്ന തപാൽ വകുപ്പിന്റെ അതിപ്രധാനമായ ഓഫീസാണ് വടകര റെയിൽവെ സ്റ്റേഷനു മുൻഭാഗത്ത് പ്രവർത്തിച്ചുവരുന്ന ആർഎംഎസ് ഓഫീസ്.
24 മണിക്കൂറും എല്ലാ തപാൽ ഉരുപ്പടികളും ബുക്ക് ചെയ്യാൻ ഇവിടെ സൗകര്യമുണ്ട്. കോടതികൾ, മോട്ടോർ വാഹന വകുപ്പ്, വിദ്യാഭ്യാസ വകുപ്പ് എന്നിവയുമായി ബന്ധപ്പെട്ട അടിയന്തര പ്രാധാന്യമുള്ള നിരവധി കത്തുകൾ അയക്കാൻ ആർഎംഎസിനെ ആശ്രയിച്ചു വരുന്നുണ്ട്.
ഇത്തരത്തിൽ വടകര ആർഎംഎസ് ഓഫീസ് കെട്ടിടം റെയിൽവേ സ്റ്റേഷൻ പരിസരത്ത് തന്നെ നിലനിർത്തേണ്ടത് അത്യാവശ്യമാണ്.
എന്നാൽ പാലക്കാട് റെയിൽവേ ഡിവിഷണൽ എഞ്ചിനീയറുടെ കത്ത് പ്രകാരം ഈ ഓഫീസ് കെട്ടിടം പെട്ടെന്ന് ഒഴിയണമെന്നാണ് നിർദേശം.
ഈ ഓഫീസിന്റെ പ്രാധാന്യം പരിഗണിച്ചു റെയിൽവേ സ്റ്റേഷൻ പരിസരത്ത് പുതിയ കെട്ടിടം ലഭ്യമാകുന്നത് വരെ നിലവിലെ കെട്ടിടത്തിൽ ആർഎംഎസ് ഓഫീസ് തുടരാൻ റെയിൽവേയുമായി ബന്ധപ്പെട്ട് നടപടികൾ സ്വീകരിക്കണമെന്ന് മുഖ്യമന്ത്രിക്ക് നൽകിയ കത്തിൽ കെ.പി.കുഞ്ഞമ്മദ്കുട്ടി എംഎൽഎ അഭ്യർഥിച്ചു.
#do #not #vacate #rms #office #KPKuhjammadkutty #MLA #gave #letter #Chief #Minister
