വടകര: കുറ്റ്യാടി നിയോജകമണ്ഡലത്തിലെ പൊതുമരാമത്ത് പ്രവർത്തികൾ അവലോകനം ചെയ്യുന്നതിനുള്ള സിഎംടി യോഗം വടകര റെസ്റ്റ് ഹൗസിൽ വച്ച് ചേർന്നു. മണിയൂർ ഐടിഐ യുടെ പുതിയ കെട്ടിടത്തിന്റെ കോൺക്രീറ്റ് ഭാഗങ്ങൾ പൂർത്തിയായി.
മണിയൂർ ഐടിഐയുടെ ഒന്നാം നിലയുടെ മേസന്റി പ്രവർത്തികൾ നടന്നുവരുന്നതായും, വില്യാപ്പള്ളി ഐടിഐയുടെ ഫ്ളോറിങ് പ്രവർത്തി 90% പൂർത്തിയായതായും യോഗം വിലയിരുത്തി. വില്യാപ്പള്ളി ഐടിഐ കെട്ടിടം ജൂലൈ മാസം പൂർത്തീകരിക്കാനും, മണിയൂർ ഐടിഐ കെട്ടിടം ആഗസ്റ്റ് മാസത്തിൽ പൂർത്തീകരിക്കാനും യോഗത്തിൽ കരാറുകാരന് നിർദ്ദേശം നൽകി.
നൂതന രീതിയിൽ ഡിസൈൻ ചെയ്തിട്ടുള്ള രണ്ട് കെട്ടിടങ്ങളിലും ഇലെക്ട്രിഫിക്കേഷൻ പ്രവർത്തികൾ കൂടി ഉൾപ്പെടുത്തിയിട്ടുണ്ട്. വർക്ക്ഷോപ്പ്, കമ്പ്യൂട്ടർ ലാബ്, ടോയ്ലറ്റ് ബ്ലോക്ക്‌ , സ്റ്റാഫ്‌ റൂം, ക്ലാസ്സ്‌ റൂം, സ്റ്റോർ റൂം, തുടങ്ങിയ സൗകര്യങ്ങളോടുകൂടി വിദ്യാർത്ഥികൾക്കും അധ്യാപകർക്കും ഏറെ പ്രയോജനകരമാകുന്ന രീതിയിലാണ് കെട്ടിടം സജ്ജമാക്കുക.
ദീർഘകാലമായി സ്ഥലപരിമിതി മൂലവും ,അസൗകര്യവും കാരണവും ബുദ്ധിമുട്ടിയിരുന്ന വില്യാപ്പള്ളി ,മണിയൂർ ഐടിഐ കെട്ടിടങ്ങൾ ഉന്നത നിലവാരത്തിലേക്ക് ഉയരുകയാണ്. യോഗത്തിൽ കെ പി കുഞ്ഞമ്മത് കുട്ടി എം എൽ എ , പെതുമരാമത്ത് വകുപ്പ് കെട്ടിട വിഭാഗം എക്സിക്യൂട്ടീവ് എഞ്ചിനീയർ ശ്രീജയൻ, പൊതുമരാമത്ത് വകുപ്പ് റോഡ്സ് വിഭാഗം അസിസ്റ്റൻറ് എക്സിക്യൂട്ടീവ് എഞ്ചിനീയർ നിധിൻ ലക്ഷ്മണൻ ,എൻജിനീയർമാർ, ഓവർസിയർമാർ എന്നിവർ പങ്കെടുത്തു.
Construction ITI buildings Villiyapally Maniyur nearing completion
