---
title: "അമേരിക്കൻ യാത്ര എന്തിന്..? 'സർക്കാരിന്റെയല്ല, ചെലവ് സംഘാടകരുടേത്'; യാത്രയിലെ വിവാദങ്ങൾക്ക് ചെന്നിത്തലയുടെ മറുപടി"
english_title: "Ramesh Chennithala US Visit Personal Diaspora Programs Not Government Expense Clarification"
publisher: "vatakaranews.in"
canonical_url: "https://vatakara.truevisionnews.com/news/382772/ramesh-chennithala-us-visit-clarification-personal-trip-not-government-expense"
published_at: "2026-09-15T16:11:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/6aa92147922d9_ramesh-chennithala-us-visit-clarification-personal-trip-not-government-expense.jpg"
keywords: ["Ramesh Chennithala", "US Visit", "Kerala Politics", "Sam Pitroda Meeting"]
---

# അമേരിക്കൻ യാത്ര എന്തിന്..? 'സർക്കാരിന്റെയല്ല, ചെലവ് സംഘാടകരുടേത്'; യാത്രയിലെ വിവാദങ്ങൾക്ക് ചെന്നിത്തലയുടെ മറുപടി

> **Lead Summary:** അമേരിക്കൻ സന്ദർശനവുമായി ബന്ധപ്പെട്ട് ഉയർന്ന ആരോപണങ്ങൾക്ക് വിശദീകരണവുമായി ആഭ്യന്തര മന്ത്രി രമേശ് ചെന്നിത്തല രംഗത്തെത്തി. തന്റെ അമേരിക്കൻ യാത്ര സർക്കാർ ചെലവിലല്ലെന്നും സംഘാടകരുടെ ചെലവിലാണ് യാത്ര നടത്തിയതെന്നും മന്ത്രി വ്യക്തമാക്കി.

## Article Content

അമേരിക്കൻ സന്ദർശനവുമായി ബന്ധപ്പെട്ട് ഉയർന്ന ആരോപണങ്ങൾക്ക് വിശദീകരണവുമായി ആഭ്യന്തര മന്ത്രി രമേശ് ചെന്നിത്തല രംഗത്തെത്തി. തന്റെ അമേരിക്കൻ യാത്ര സർക്കാർ ചെലവിലല്ലെന്നും സംഘാടകരുടെ ചെലവിലാണ് യാത്ര നടത്തിയതെന്നും മന്ത്രി വ്യക്തമാക്കി.

ഫെയ്സ്ബുക്കിൽ പങ്കുവെച്ച വീഡിയോ സന്ദേശത്തിലൂടെയാണ് മന്ത്രി വിശദീകരണം നൽകിയത്. ജയ്ഹിന്ദ് ടിവിയുടെ ആദ്യകാല നേതൃനിരയിൽ ഉണ്ടായിരുന്ന ഫെലിക്സ് സൈമണിന്റെ മകന്റെ വിവാഹത്തിൽ പങ്കെടുക്കുന്നതിനായാണ് ആഭ്യന്തര മന്ത്രി കുടുംബസമേതം അമേരിക്കയിലെത്തിയത്.

സന്ദർശനത്തിന്റെ ഭാഗമായി അമേരിക്കയിലെ വിവിധ മലയാളി സംഘടനകൾ സംഘടിപ്പിച്ച പരിപാടികളിലും ഓണാഘോഷങ്ങളിലും മന്ത്രി പങ്കെടുത്തു. കേരള കോൺഗ്രസ് (എം) നേതാവ് ജോസ് കെ. മാണിയടക്കമുള്ളവരും സന്ദർശനത്തിന്റെ ഭാഗമായി ഒപ്പമുണ്ടായിരുന്നു.

ചിക്കാഗോയിൽ ഇന്ത്യൻ ടെലികോം വിപ്ലവത്തിന്റെ ശില്പിയായ സാം പിത്രോദയുമായി നടത്തിയ കൂടിക്കാഴ്ചയാണ് സന്ദർശനത്തിലെ പ്രധാന ഭാഗമായത്. രാജീവ് ഗാന്ധിയുടെ കാലത്ത് ഇന്ത്യയെ സാങ്കേതികവിദ്യയുടെ പുതുയുഗത്തിലേക്ക് നയിച്ച സാം പിത്രോദയുടെ കാഴ്ചപ്പാടുകൾ ഡിജിറ്റൽ കാലഘട്ടത്തിലും പ്രസക്തമാണെന്ന് മന്ത്രി പറഞ്ഞു.

കൂടിക്കാഴ്ചയിൽ വ്യക്തിവിവരങ്ങളുടെ സ്വകാര്യത, ഡാറ്റയുടെ ഉടമസ്ഥതയും നിയന്ത്രണവും പൗരന്മാർക്ക് ഉറപ്പാക്കേണ്ടതിന്റെ ആവശ്യകത, അഭിപ്രായ സ്വാതന്ത്ര്യത്തോടൊപ്പം ഡിജിറ്റൽ ഇടങ്ങളിലെ ഉത്തരവാദിത്തബോധം ഉറപ്പാക്കേണ്ടത് തുടങ്ങിയ വിഷയങ്ങൾ ചർച്ചയായി.

ലോകത്തിന്റെ വിവിധ ഭാഗങ്ങളിലുള്ള ഇന്ത്യൻ പ്രതിഭകളുടെ അറിവും വൈദഗ്ധ്യവും രാജ്യത്തിന്റെ വികസനത്തിനായി എങ്ങനെ പ്രയോജനപ്പെടുത്താമെന്നതും ഇരുവരും ചർച്ച ചെയ്തു.കേരളത്തിന്റെ ഉയർന്ന പൗരബോധത്തെയും സാക്ഷരതയെയും സാം പിത്രോദ പ്രത്യേകം പ്രശംസിച്ചതായി മന്ത്രി പറഞ്ഞു.

വോട്ട് രേഖപ്പെടുത്തുന്നതിനായി മാത്രം വിമാന ടിക്കറ്റെടുത്ത് നാട്ടിലെത്തുന്ന മലയാളികളുടെ ജനാധിപത്യ ബോധം മറ്റെവിടെയും കാണാനാകില്ലെന്ന സാം പിത്രോദയുടെ പരാമർശവും മന്ത്രി സാമൂഹ്യമാധ്യമ കുറിപ്പിൽ പങ്കുവച്ചു.

ചിക്കാഗോയിലെ സാം പിത്രോദയുടെ സ്റ്റുഡിയോയും മന്ത്രി സന്ദർശിച്ചു. ഇതിലൂടെ സാം പിത്രോദയിലെ കലാകാരനെയും നേരിട്ട് പരിചയപ്പെടാൻ കഴിഞ്ഞതായി മന്ത്രി പറഞ്ഞു.അതേസമയം ആഭ്യന്തര മന്ത്രിയുടെ അമേരിക്കൻ യാത്രയെക്കുറിച്ച് വിവിധ ആരോപണങ്ങളും പ്രചാരണങ്ങളും ഉയർന്നിരുന്നു.

> ഇതിന് പിന്നാലെയാണ് മന്ത്രി വീഡിയോ സന്ദേശത്തിലൂടെ വിശദീകരണം നൽകിയത്.“സർക്കാർ ചെലവിലല്ല ഈ അമേരിക്കൻ യാത്ര, സംഘാടകരുടെ ചെലവിലാണ്” എന്നായിരുന്നു ആരോപണങ്ങൾക്ക് മന്ത്രി നൽകിയ മറുപടി.

യാത്രയുടെ ഉദ്ദേശ്യവും പശ്ചാത്തലവും വ്യക്തമാക്കിയ മന്ത്രി, സർക്കാർ ഖജനാവിന് യാത്രയുമായി ബന്ധപ്പെട്ട് യാതൊരു ചെലവും ഉണ്ടായിട്ടില്ലെന്നും വ്യക്തമാക്കി.

**English Summary:**

Home Minister Ramesh Chennithala clarified that his US visit was personal and linked to diaspora events, not funded by government but by organizers, in a Facebook video message. He traveled with family to attend wedding of son of Felix Simon, early JaiHind TV leader, and attended Malayali association events and Onam celebrations with KC(M) leader Jose K Mani. Key event was meeting with telecom revolution architect Sam Pitroda in Chicago, discussing data privacy, data ownership, digital responsibility, freedom of expression and leveraging global Indian talent. Pitroda praised Kerala's civic awareness, literacy and democratic spirit of Malayalis flying home just to vote. Chennithala also visited Pitroda's studio.

### Related Links & Sources
- [Original Story Source](https://vatakara.truevisionnews.com/news/382772/ramesh-chennithala-us-visit-clarification-personal-trip-not-government-expense)