---
title: "രണ്ടാം ഘട്ടത്തിലേക്ക്;ലഹരി മാഫിയക്കെതിരെ പ്രതിഷേധം ശക്തമാക്കാനൊരുങ്ങി എസ്ഡിപിഐ "
english_title: " SDPI is going to intensify the protest against the Lahari mafia"
publisher: "vatakaranews.in"
canonical_url: "https://vatakara.truevisionnews.com/news/85611/sdpi-is-going-to-intensify-the-protest-against-the-lahari-mafia"
published_at: "2022-12-16T17:57:00+05:30"
category: "News"
language: "ml"
image: "https://cf.zdn.im/img/truevisionnews.com/0/image-uploads/639c6470e15db_SDPI_PRESS.jpg"
keywords: []
---

# രണ്ടാം ഘട്ടത്തിലേക്ക്;ലഹരി മാഫിയക്കെതിരെ പ്രതിഷേധം ശക്തമാക്കാനൊരുങ്ങി എസ്ഡിപിഐ 

> **Lead Summary:** **വടകര: **സ്കൂൾ വിദ്യാർത്ഥികളെ കേന്ദ്രീകരിച്ചുള്ള അഴിയൂരിലെ ലഹരി മാഫിയക്കെതിരെ എസ്ഡിപിഐ രണ്ടാംഘട്ട പ്രക്ഷോഭത്തിലേക്ക്. സ്കൂൾ വിദ്യാർത്ഥികളെ ലഹരിക്ക് അടിമപ്പെടുത്തിയും ലഹരിക്കടത്തിന് ഉപയോഗിക്കുകയും ചെയ്ത, വൻ ലഹരി മാഫിയ സംഘമാണിത്. കേരള മനസാക്ഷിയെ ഞെട്ടിച്ച സംഭവത്തെക്കുറിച്ച് അന്വേഷിക്കുന്നതിൽ പോലീസ് അലംഭാവം കാണിക്കുകയാണ്.

## Article Content

**വടകര: **സ്കൂൾ വിദ്യാർത്ഥികളെ കേന്ദ്രീകരിച്ചുള്ള അഴിയൂരിലെ ലഹരി മാഫിയക്കെതിരെ എസ്ഡിപിഐ രണ്ടാംഘട്ട പ്രക്ഷോഭത്തിലേക്ക്. സ്കൂൾ വിദ്യാർത്ഥികളെ ലഹരിക്ക് അടിമപ്പെടുത്തിയും ലഹരിക്കടത്തിന് ഉപയോഗിക്കുകയും ചെയ്ത, വൻ ലഹരി മാഫിയ സംഘമാണിത്. കേരള മനസാക്ഷിയെ ഞെട്ടിച്ച സംഭവത്തെക്കുറിച്ച് അന്വേഷിക്കുന്നതിൽ പോലീസ് അലംഭാവം കാണിക്കുകയാണ്.

സംഭവത്തിൽ സ്കൂൾ അധികൃതരുടെ ഭാഗത്ത് നിന്നുണ്ടായ കുറ്റകരമായ അനാസ്ഥയെ കുറിച്ച് വിദ്യാഭ്യാസ വകുപ്പ് തുടരുന്ന നിസ്സംഗതയിലും പ്രതിഷേധിച്ചാണ് രണ്ടാംഘട്ട ജനകീയ പ്രക്ഷോഭം തുടങ്ങാൻ എസ്ഡിപിഐ തീരുമാനിച്ചത്. 24-11-2022 ന് വിദ്യാർത്ഥിനിയെ അസ്വാഭാവിക നിലയിൽ കണ്ടെത്തിയിട്ടും ആരോ എന്നെ വെള്ളപ്പൊടി മണപ്പിച്ചു എന്ന് അധ്യാപകരെ അറിയിച്ചിട്ടും യാതൊരു നടപടിയും സ്കൂൾ അധികൃതരുടെ ഭാഗത്തുനിന്നുണ്ടായിട്ടില്ല.

ചൈൽഡ് ലൈൻ അധികൃതരെയോ പോലീസ് സ്റ്റേഷനിലോ വിവരം അറിയിക്കാതിരുന്നതും, വിശദമായ വൈദ്യ പരിശോധന കുട്ടിക്ക് ലഭ്യമാക്കാതിരുന്നതിലും സ്കൂൾ അധികൃതർക്ക് സംഭവിച്ചത് വലിയ വീഴ്ചയാണ്. ഇതിന്റെ ഉത്തരവാദികൾക്കെതിരെ അന്വേഷണം നടത്തി നടപടി സ്വീകരിച്ചില്ലെങ്കിൽ ഇത്തരം സംഭവങ്ങൾ വീണ്ടും ആവർത്തിക്കാൻ ഇടയാകും.

2-12-2022ന് പോലീസ് സ്റ്റേഷനിൽ എത്തി ലഹരി മാഫിയ സംഘത്തിൻറെ ഇടപെടലുകളെ കുറിച്ച് കുട്ടി മൊഴി നൽകിയിട്ടും അത്തരത്തിൽ ശക്തമായ വകുപ്പുകൾ ചേർത്ത് കേസെടുക്കുവാൻ തയ്യാറാവാതിരുന്നതും അടിയന്തിര വൈദ്യ പരിശോധനക്ക് വിദ്യാർഥിനിയെ വിധേയമാക്കാൻ നടപടി സ്വീകരിക്കാതിരുന്നതും, സ്റ്റേഷനിൽ എത്തിയ ലഹരി മാഫിയ സംഘത്തിൻറെ പ്രധാന കണ്ണി എന്ന് സംശയിക്കുന്ന യുവതിയെക്കുറിച്ച് അന്വേഷണം നടത്താൻ തയ്യാറാവാതിരുന്നതും, പോലീസ് സ്റ്റേഷൻ വളപ്പിൽ രണ്ട് യുവജന സംഘടന നേതാക്കൾക്ക് കുട്ടിയെ സമ്മർദ്ദത്തിലാക്കുന്ന വിധം സംസാരിക്കാൻ അവസരം നൽകിയതും കേട്ടുകൾവി പോലും ഇല്ലാത്ത സംഭവമാണ്.

ഉയർന്ന തലത്തിലുള്ള അന്വേഷണസംഘം അന്വേഷിച്ചാൽ മാത്രമേ, സമൂഹത്തെ പ്രതികൂലമായി ബാധിക്കുന്ന ലഹരി മാഫിയ സംഘത്തിന്റെ അവസാന കണ്ണിയെയും കണ്ടെത്താൻ സാധിക്കുകയുള്ളൂ. സ്കൂൾ അധികൃതർക്കെതിരെ വിദ്യാർഥിനിയുടെ ഉമ്മ വിദ്യാഭ്യാസമന്ത്രിക്കും വകുപ്പിനും പരാതി നൽകിയിട്ടും തുടർനടപടി സ്വീകരിക്കാത്തതിൽ പ്രതിഷേധിച്ച് 19-12-2022 തിങ്കളാഴ്ച കാലത്ത് 10 30 ന് വടകര ഡിഇഒ ഓഫീസിനു മുന്നിൽ പ്രതിഷേധ ധർണ്ണ സംഘടിപ്പിക്കും.സംഭവത്തിൽ പൊതുജനങ്ങളെ ബോധവൽക്കരിക്കുന്നതിനുവേണ്ടി 23-12-2022 വെള്ളിയാഴ്ച എസ്ഡിപിഐ അഴിയൂർ പഞ്ചായത്ത് പ്രസിഡണ്ട് സൈനുദ്ദീൻ എ കെ യുടെ നേതൃത്വത്തിൽ ഏകദിന വാഹന പ്രചരണ ജാഥ സംഘടിപ്പിക്കും. സംഭവത്തിലെ യഥാർത്ഥ പ്രതികളെ കണ്ടെത്തുന്നത് വരെ ശക്തമായ ജനകീയ-നിയമ പോരാട്ടവുമായി എസ്ഡിപിഐ രംഗത്തുണ്ടാവും.

പത്രസമ്മേളനത്തിൽ പങ്കെടുത്തവർ ഷംസീർ ചോമ്പാല (Sdpi വടകര മണ്ഡലം പ്രസിഡണ്ട്),സാലിം പുനത്തിൽ (അഴിയൂർ പഞ്ചായത്ത് ഭരണസമിതിയംഗം)സീനത്ത് ബഷീർ (അഴിയൂർ പഞ്ചായത്ത് ഭരണസമിതിയംഗം)യാസർ പൂഴിത്തല (sdpi, അഴിയൂർ പഞ്ചായത്ത് സിക്രട്ടറി) പങ്കെടുത്തു.

### Related Links & Sources
- [Original Story Source](https://vatakara.truevisionnews.com/news/85611/sdpi-is-going-to-intensify-the-protest-against-the-lahari-mafia)