ബസിനുള്ളിൽ കൂട്ടനിലവിളി.....! കുറ്റ്യാടി ചുരത്തിൽ ബ്രേക്ക് നഷ്ടപ്പെട്ട പ്രിയദർശിനി ബസ് പിന്നിലേയ്ക്ക് ഉരുണ്ടു; ഡ്രൈവറുടെ മനോധൈര്യം 160 യാത്രക്കാരുടെ ജീവൻ കാത്തു

കോഴിക്കോട്: ( www.truevisionnews.com ) കുറ്റ്യാടി ചുരത്തിൽ കെഎസ്ആർടിസി പ്രിയദർശിനി ബസിന്റെ ബ്രേക്ക് തകരാറിലായി വൻ അപകടം ഒഴിവായി. ഡ്രൈവറുടെ അവസരോചിതമായ ഇടപെടലും മനോധൈര്യവുമാണ് 160-ലധികം യാത്രക്കാരുടെ ജീവൻ രക്ഷിച്ചത്.

ബുധനാഴ്ച രാവിലെ 10.30-ഓടെയാണ് സംഭവം. തൊട്ടിൽപ്പാലത്ത് നിന്ന് മാനന്തവാടിക്ക് പുറപ്പെട്ട കെഎസ്ആർടിസി ബസ് ചുരത്തിലെ എട്ടാം വളവിൽ എത്തിയപ്പോഴാണ് ബ്രേക്ക് പ്രവർത്തിക്കാതായത്. അമിത യാത്രക്കാരുമായി ചുരം കയറിയതിനെ തുടർന്ന് വാഹനത്തിന്റെ ജോയിന്റും എയർ പൈപ്പും പൊട്ടുകയായിരുന്നുവെന്നാണ് പ്രാഥമിക വിവരം.

ബ്രേക്ക് നഷ്ടപ്പെട്ടതോടെ ബസ് പിന്നോട്ട് ഉരുണ്ടുതുടങ്ങി. ബസിനുള്ളിൽ കൂട്ടനിലവിളി ഉയർന്നു. ഈ നിർണായക ഘട്ടത്തിൽ ഡ്രൈവറായ പേരാമ്പ്ര സ്വദേശി എൻ.പി. സുധീർ സമയോചിതമായി ഇടപെട്ടു. ബസിന്റെ പിൻഭാഗം വലതുവശത്തെ മലയോര ഭിത്തിയിൽ ഇടിപ്പിച്ച് വാഹനം നിർത്താൻ അദ്ദേഹത്തിന് സാധിച്ചു.

ഇതാണ് വൻ ദുരന്തം ഒഴിവാക്കിയത്.അപകടത്തെ തുടർന്ന് ഒരു മണിക്കൂറോളം കുറ്റ്യാടി ചുരത്തിൽ ഗതാഗതം തടസപ്പെട്ടു. രാവിലെ 10 മണിക്ക് കോഴിക്കോട് നിന്നാണ് ബസ് ചുരം കയറിയത്.

Also read: മരണം ഞെട്ടലായി; വടകര വില്ല്യാപ്പളിയിൽ ആറു വയസ്സുകാരി വയറുവേദനയെ തുടർന്ന് മരിച്ചു

ചുരത്തിനു താഴെ പൂതംപാറയിൽ മാനന്തവാടി ഡിപ്പോയുടെ മറ്റൊരു ബസ് ബ്രേക്ക്ഡൗണായി കിടക്കുന്നുണ്ടായിരുന്നു. അതിലെ യാത്രക്കാർ കോഴിക്കോട് നിന്ന് വന്ന ബസിലേക്ക് മാറിക്കയറിയതാണ് തിരക്കിന് കാരണമായത്. അമിത യാത്രക്കാരുള്ളതിനാൽ കുറച്ചുപേർ ഇറങ്ങണമെന്ന് ഡ്രൈവറും കണ്ടക്ടറും അഭ്യർഥിച്ചെങ്കിലും ആരും സഹകരിച്ചില്ല.

മഴയുള്ള സമയമായിരുന്നതിനാൽ ബസ് കുറച്ചുനേരം പൂതംപാറയിൽ നിർത്തിയ ശേഷമാണ് ചുരം കയറിയത്.അപകടത്തിൽ ആർക്കും ഗുരുതര പരിക്കുകളില്ല. സംഭവത്തിൽ കെഎസ്ആർടിസി അധികൃതർ അന്വേഷണം ആരംഭിച്ചു.

Content Highlight: KSRTC Bus Brake Failure in Kuttiady Ghat, Driver Averts Major Accident

#Latest News #Kuttiady Ghat Accident #KSRTC Priyadarshini Bus #Brake Failure #Kozhikode News