വടകര: നിലവിൽ പൊതു ഗതാഗത സംവിധാനങ്ങൾ ഒന്നും തന്നെയില്ലാത്ത വടകര നിയോജകമണ്ഡലത്തിലെ കണ്ണൂക്കര ഒഞ്ചിയം വെള്ളികുളങ്ങര ഓർക്കാട്ടേരി കാർത്തികപ്പള്ളി വില്യാപ്പള്ളി വടകര റൂട്ടിൽ കെ.എസ്.ആർ.ടി.സി സർവീസ് അനുവദിക്കണമെന്ന് കെ.കെ.രമ എം.എൽ.എ. ഈ ആവശ്യം ഉന്നയിച്ചു ഗതാഗത വകുപ്പ് മന്ത്രി ആന്റണി രാജുവിനെ നേരിൽ കണ്ട് നിവേദനം സമർപ്പിച്ചു.
നേരത്തെ ഒരു പ്രൈവറ്റ് ബസ് ഇതുവഴി സർവീസ് നടത്തുന്നുണ്ടായിരുന്നെങ്കിലും ഇപ്പോൾ സർവീസ് നിർത്തിവച്ചിരിക്കുകയാണ്.
ഇതു മൂലം ഈ പ്രദേശത്തെ വിദ്യാർത്ഥികളും മറ്റ് ദൈനംദിന ആവശ്യങ്ങൾക്കായി യാത്ര ചെയ്യുന്ന പ്രദേശവാസികളും ദുരിതത്തിലായിരിക്കുകയാണ്.
20 കിലോമീറ്ററോളം ദൈർഘ്യമുള്ള ഈ റൂട്ടിൽ കെ.എസ്.ആർ.ടി.സിയുടെ ഒരു പുതിയ സർവീസ് ആരംഭിക്കുകയാണെങ്കിൽ ലാഭകരമായ രീതിയിൽ ദിവസേന അഞ്ചു സർവീസുകളെങ്കിലും നടത്താൻ സാധിക്കും എന്നാണ് ഈ രംഗത്തെ വിദഗ്ദർ അഭിപ്രായപ്പെടുന്നത്.
തികച്ചും സാധാരണക്കാരായ ജനങ്ങൾ താമസിക്കുന്ന ഈ മേഖലയുടെ പ്രത്യേക സാഹചര്യം കണക്കിലെടുത്തും പ്രദേശവാസികളുടെ ആവശ്യം പരിഗണിച്ചുമാണ് ഈ വിഷയം സർക്കാരിന്റെ മുൻപിൽ അവതരിപ്പിച്ചത്.
രണ്ടാഴ്ചക്കകം താത്കാലിക സർവീസ് അനുവദിക്കാമെന്നും തുടന്നുള്ള പരിശോധനയുടെ അടിസ്ഥാനത്തിൽ ഇത് സ്ഥിരപ്പെടുത്തുന്നത് സംബന്ധിച്ചു ആലോചിക്കാമെന്നും മന്ത്രി ഉറപ്പു നൽകിയതായും എം.എൽ.എ അറിയിച്ചു.
#Onchiyam #Vilyapally #Vadakara #route #KSRTC #needed #KKRamaMLA #Transportminister
